Nga Johannes Winterhagen, Bruksel
Bashkimi Evropian synon të rishpërndajë frekuencat për komunikimet celulare përmes satelitëve. Ofruesve amerikanë, si Starlink, do t’u mbetej vetëm një e treta e kapacitetit të frekuencave. Kjo po shkakton një mosmarrëveshje.
Asnjë zonë pa sinjal, askund. Ky ka qenë gjithmonë premtimi i telefonisë satelitore. Tani po përshkallëzohet mosmarrëveshja midis Shteteve të Bashkuara dhe Bashkimit Evropian për ndarjen e ardhshme të frekuencave brenda brezit vendimtar për këtë teknologji.
Andrew Puzder, ambasadori amerikan në Bashkimin Evropian, i deklaroi gazetës Financial Times se kompanitë evropiane rrezikojnë të përballen me “masa hakmarrëse shkatërruese” nga Uashingtoni, nëse BE-ja këmbëngul në planin për të rezervuar një pjesë të frekuencave të brezit 2 gigaherc (GHz) për kompanitë evropiane.
Në maj, Komisioni Evropian propozoi vendosjen e një procedure të re për ndarjen e frekuencave, të koordinuar nga vetë Komisioni. Sipas propozimit, frekuencat do të ndaheshin në tri pjesë të barabarta.
Një e treta do të rezervohej për përdorim shtetëror, ndërsa dy të tretat për përdorim komercial. Megjithatë, gjysma e frekuencave të destinuara për përdorim komercial do të ishte ekskluzivisht në dispozicion të operatorëve evropianë, ndërsa pjesa tjetër do të ishte e hapur, përmes konkurrencës së lirë, edhe për kompanitë jashtë Evropës.
Rregullorja aktuale, që daton nga viti 2008, nuk parashikon një ndarje të hollësishme të frekuencave sipas kategorive të ndryshme të operatorëve dhe vendit të tyre të origjinës. Megjithatë, autorizimet ekzistuese janë të vlefshme vetëm deri në maj të vitit të ardhshëm, prandaj koha për marrjen e një vendimi është e kufizuar.
BE-ja kërkon më shumë kapacitet frekuencash për satelitët e saj
Komisioni Evropian e arsyetoi propozimin, ndër të tjera, me nevojën për të krijuar kapacitet të mjaftueshëm për transmetimin e informacioneve kritike për sigurinë dhe atyre me rëndësi ushtarake.
Për këtë arsye, një pjesë e konsiderueshme e frekuencave të rezervuara për përdorim shtetëror pritet të shfrytëzohet nga konstelacioni satelitor IRIS², i cili ende duhet të ndërtohet.
Programi, i nisur pas sulmit rus ndaj Ukrainës në vitin 2022, parashikon funksionimin e rreth 350 satelitëve në dy orbita.
Pasi projekti IRIS² fillimisht pësoi vonesa, edhe për shkak të mosmarrëveshjeve mes operatorëve të mundshëm, zëdhënësi i njërit prej prodhuesve pjesëmarrës i tha gazetës F.A.Z.: “Tani projekti ka marrë vërtet hov”.
Konsorciumi, në të cilin marrin pjesë edhe tri kompani gjermane – Airbus, OHB dhe Deutsche Telekom – ka arritur tashmë marrëveshje për një ndarje të qartë të përgjegjësive ndërmjet operimit të sistemit dhe prodhimit të komponentëve të veçantë.
Telefoni satelitore pa pajisje të posaçme të kushtueshme
Megjithatë, shkaku kryesor i mosmarrëveshjes me Shtetet e Bashkuara është përdorimi civil i këtij brezi frekuencash.
Kjo sepse ai mundëson komunikimin telefonik përmes satelitëve duke përdorur antenat e telefonave inteligjentë të sotëm, pa pasur nevojë për pajisje shtesë të kushtueshme.
Për këtë arsye, SpaceX ka investuar në ndërtimin e rrjetit të vet të telefonisë celulare.
Nga ana tjetër, Amazon ka kërkuar nga autoritetet amerikane autorizimin për rrjetin e saj Leo, të përbërë nga 5.000 satelitë, me synimin për të ofruar shërbime telefonike në zona të largëta.
Të hënën u bë e ditur gjithashtu se Deutsche Telekom po bashkëpunon me konkurrentët Orange, Telefónica dhe Vodafone për të ofruar frekuenca në brezin 2 megaherc (MHz).
Sipas njoftimit të shkurtër, kompanitë planifikojnë të ndërtojnë një infrastrukturë të përbashkët tokësore, së bashku me sistemin e saj të kontrollit, por jo të marrin pjesë drejtpërdrejt në një konstelacion satelitor.
Ky i fundit do të sigurohet nga një partner që ende nuk është përzgjedhur.
(Frankfurter Allgemeine Zeitung – F.A.Z.)
