Pse pirja e duhanit nuk i dëmton mushkëritë e të gjithë duhanpirësve njëlloj? Provat e reja nga një studim i publikuar në Nature Genetics zbulojnë nse mushëritë e disa personave kanë një mbrojtje të fortë dhe natyrale kundër mutacioneve përgjegjëse për shfaqjen e kancerit.
Gjetjet specifike konsiderohen si një hap i rëndësishëm drejt parandalimit dhe zbulimit të hershëm të rrezikut të kancerit të mushkërive.
Studiuesit krahasuan mutacionet në qelizat e mushkërive të 14 jo-duhanpirësve, të moshës 11 deri në 86 vjeç dhe 19 duhanpirësve, të moshës 44 deri në 81 vjeç. Qelizat e mushkërive u mblodhën nga pacientët që i nënshtroheshin testeve që nuk kishin lidhje me kontrollin e kancerit.
“Qelizat specifike të mushkërive kanë aftësinë të mbijetojnë për vite, madje edhe dekada, dhe kështu mund të grumbullojnë mutacione me kalimin e kohës dhe me pirjen e duhanit,” shpjegon autori kryesor i studimit Dr. Simon Spivack, profesor në Kolegjin e Mjekësisë Albert Einstein dhe pulmonolog në Qendrën Mjekësore Montefiore në qytetin e Nju Jorkut. “Nga të gjitha llojet e qelizave në mushkëri, këto kanë shanset më të larta për t’u bërë kanceroze.”
Konkretisht, ajo që studiuesit zbuluan është se megjithëse mutacionet grumbullohen në qelizat e mushkërive të joduhanpirësve me kalimin e moshës, më shumë mutacione u gjetën në qelizat e duhanpirësve.
“Eksperimentalisht, kjo konfirmon se pirja e duhanit rrit rrezikun e kancerit të mushkërive, duke rritur frekuenca e mutacioneve, sipas hipotezave tona të mëparshme. Kjo është ndoshta një arsye pse pak jo duhanpirës sëmuren nga kanceri i mushkërive, në krahasim me 10-20% të duhanpirësve të rregullt”, shton Dr. Simon Spivack.
Në përputhje me rrethanat, studiuesit zbuluan gjithashtu se numri i mutacioneve të qelizave të mushkërive u rrit me numrin e viteve të pirjes së duhanit, duke rritur ndoshta rrezikun e kancerit. Megjithatë, rritja e mutacioneve qelizore u ndal pas 23 vitesh te njerëzit që pinin një paketë cigare në ditë.
“Të dhënat tona sugjerojnë se këta individë mund të kenë mbijetuar për kaq gjatë, pavarësisht nga pirja e duhanit, sepse ata ishin në gjendje të shtypnin më tej akumulimin e mutacioneve. Individët mund të kenë sisteme që riparojnë dëmtimin e ADN-së ose detoksifikojnë tymin e cigares,” thekson Dr. Simon Spivack.
Hapi tjetër, sipas bashkëautorit Jan Vijg, është zhvillimi i mënyrave për të matur aftësinë e një personi për të riparuar ADN-në, e cila mund të sigurojë një mënyrë të re për të vlerësuar rrezikun e kancerit të mushkërive.
