Pasi një version i këngës së Madonna-s “Like a Prayer”, i realizuar me inteligjencë artificiale, arriti në vendin e parë të klasifikimit muzikor, industria muzikore australiane ka vendosur të marrë masa.
Muzika e krijuar nga inteligjenca artificiale (IA) nuk do të ketë më vend në klasifikimet zyrtare muzikore të Australisë. Rregullat e reja synojnë të mbrojnë “origjinën njerëzore të krijimtarisë artistike”, njoftoi të martën Shoqata Australiane e Industrisë së Regjistrimeve, Australian Recording Industry Association (ARIA).
Sipas organizatës së industrisë muzikore, ndryshimet do të hyjnë në fuqi të premten.
Sipas rregullave të reja, këngët që përfshihen në klasifikimet muzikore duhet të jenë “në thelb të krijuara nga njerëzit”.
Përdorimi i inteligjencës artificiale nuk ndalohet. Megjithatë, muzika e krijuar tërësisht nga IA-ja nuk do të pranohet më në klasifikimet e ARIA-s.
Në korrik, një version i këngës së Madonna-s “Like a Prayer” kishte arritur në vendin e parë të klasifikimit muzikor australian. Më vonë u zbulua se vokali dhe bateritë ishin gjeneruar nga inteligjenca artificiale.
Po në korrik, disa shoqata të industrisë muzikore prezantuan një sistem për etiketimin e muzikës së krijuar tërësisht ose pjesërisht me inteligjencë artificiale.
Sistemi vullnetar i etiketimit është projektuar për t’u zbatuar në mbarë botën dhe parashikohet të përdoret edhe nga platformat e transmetimit muzikor.
Shërbimi i transmetimit Deezer tashmë ka futur një etiketim të posaçëm për muzikën e gjeneruar nga IA-ja.
Sipas të dhënave të Deezer-it, inteligjenca artificiale përdoret tashmë në pothuajse çdo të dytën këngë të re që publikohet në platformë.
Ndërkohë, Spotify ka njoftuar se, duke filluar nga mesi i shtatorit, profilet e krijuara me inteligjencë artificiale do t’i shënojë me etiketën “AI Persona”./FAZ
