Kamerat Flock po u bashkohen qendrave të të dhënave si një nga çështjet kryesore që po ngjallin frikë dhe kundërshtim në prag të zgjedhjeve të mesmandatit në SHBA, ndërsa anëtarë të Kongresit dhe kandidatë për Kongres po përpiqen të përfitojnë politikisht nga vala e papritur e zemërimit në bazë ndaj këtij sistemi mbikëqyrjeje të mbështetur nga inteligjenca artificiale.
Pse ka rëndësi: Përplasja rreth rrjetit masiv amerikan të kamerave që lexojnë targat e automjeteve tregon se sa shpejt inteligjenca artificiale është zhvendosur nga një çështje periferike e politikës kombëtare në një nga temat qendrore të fushatës për zgjedhjet e mesmandatit.
Qendrat e të dhënave janë bërë tashmë një çështje e madhe në zgjedhje, me kandidatët që garojnë se kush do të shfaqë kundërshtimin më të fortë ndaj ndërtimit të objekteve të tilla, të cilat konsumojnë sasi të mëdha energjie.
Ndërkohë, super-PAC-et e lidhura me kompanitë e inteligjencës artificiale kanë shpenzuar dhjetëra miliona dollarë duke u përplasur mes tyre në garat për Kongresin rreth pyetjes se deri në çfarë mase qeveria federale duhet ta rregullojë këtë teknologji.
Tani, kamerat e mbikëqyrjes po hapin një front të ri në debatin për inteligjencën artificiale.
Zhvillimi kryesor: Abdul El-Sayed, kandidati demokrat për Senatin amerikan nga Miçigani, publikoi të mërkurën një video në platformën X, në të cilën e lidhi kundërshtarin e tij republikan, ish-kongresmenin Mike Rogers, me kamerat Flock.
“Ka pasur një përhapje masive të kamerave Flock, gjithandej, të cilat vëzhgojnë çdo lëvizje tuajën për të mbledhur informacione pa e kuptuar ju fare”, thotë El-Sayed në video, ndërsa në sfond dëgjohet kënga e viteve 1980 “Somebody’s Watching Me”.
El-Sayed e akuzon Rogersin se e ka mbështetur këtë praktikë, duke iu referuar një seance dëgjimore të vitit 2013, kur Rogers, në atë kohë kryetar i Komisionit të Inteligjencës të Dhomës së Përfaqësuesve, kishte thënë:
“Privatësia juaj nuk mund të jetë shkelur nëse nuk e dini se privatësia juaj është shkelur, apo jo?”
Fushata e Rogersit nuk iu përgjigj kërkesës së Axios për koment.
Çfarë duhet ditur: Flock dhe kompani të ngjashme po përballen me një reagim të fortë publik për kamerat e tyre me inteligjencë artificiale që lexojnë targat e automjeteve, veçanërisht pas raportimeve për raste kur policë e kanë keqpërdorur teknologjinë.
Komuna dhe qytete në të gjithë SHBA-në kanë filluar tashmë t’i ndërpresin kontratat me Flock-un.
Rrjeti i gjerë i kompanisë, me rreth 120.000 kamera, u mundëson strukturave të zbatimit të ligjit të gjurmojnë lëvizjet e automjeteve.
Në disa raste, persona të zemëruar kanë shkuar edhe më tej, duke sabotuar fizikisht kamerat.
Kompania ka mbrojtur praktikat e saj dhe thotë se po përmirëson mekanizmat për mbrojtjen e privatësisë. Flock i tha Axios se ka qenë duke “dëgjuar klientët, komunitetet dhe grupet për të drejtat civile”.
Flock argumenton gjithashtu se teknologjia e saj përdoret për qëllime të dobishme. Sipas kompanisë, kamerat e saj kanë ndihmuar në rreth 1 milion hetime policore dhe në gjetjen e afërsisht 10.000 personave të zhdukur.
Situata politike: Edhe kandidatët demokratë për Dhomën e Përfaqësuesve po përfshihen gjithnjë e më shumë në reagimin kundër kamerave Flock.
Demokratja nga Ohio, Kristina Knickerbocker, deklaroi se kundërshtari i saj, ish-kryetari i Komisionit të Inteligjencës të Dhomës së Përfaqësuesve, republikani Mike Turner, “ka shtyrë për vendosjen e më shumë kamerave Flock në qendër të Daytonit”.
“Tani është zbuluar se ato kamera kanë kryer mijëra kërkime që kanë shkelur rregullat e qytetit tonë”, shtoi ajo.
Fushata e Turnerit nuk iu përgjigj kërkesës për koment.
Chaz Molder, kandidati demokrat në distriktin e pestë të Tennessee-s, tha për kamerat Flock:
“Një tejkalim i tillë i pushtetit nga qeveria e madhe nuk ka vend as në vendin tonë, as në Tennessee.”
Ndërsa William Lawrence, kandidat progresist demokrat për Dhomën e Përfaqësuesve nga Miçigani, deklaroi:
“Politikanët po arkëtojnë çeqet e tyre ndërkohë që lejojnë që kamerat e tyre të vendosen gjithandej.”
Përtej ndarjeve partiake: Kamerat Flock po shfaqen si një nga çështjet e rralla ku ekziston një shkallë e konsiderueshme pajtimi dypartiak në Capitol Hill. Në javët e fundit, kundër tyre kanë folur veçanërisht konservatorët dhe progresistët.
Muajin e kaluar, tre republikanë të Dhomës së Përfaqësuesve, të udhëhequr nga kongresmeni Tim Burchett nga Tennessee, paraqitën një projektligj që do t’i ndalonte qeverisë federale blerjen e kamerave Flock ose të teknologjive të ngjashme.
Senatori Bernie Sanders shkroi të martën në rrjetet sociale:
“Flock ka instaluar afro 100.000 kamera në mbarë Amerikën për të gjurmuar çdo lëvizje tuajën… NDALONI MBIKËQYRJEN MASIVE ME IA. NDALONI FLOCK.”
Përfundimi: Kundërshtimi ndaj kamerave Flock po bashkohet me debatin tashmë shumë të fortë për qendrat e të dhënave, duke e shndërruar inteligjencën artificiale në një nga çështjet më të fuqishme politike të fushatës zgjedhore të vitit 2026.
Jake Johnson, kandidat demokrat për Dhomën e Përfaqësuesve nga Minnesota, tha për Axios se nuk ishte i befasuar që votuesit po reagojnë fuqishëm ndaj kamerave Flock, duke pasur parasysh ndjenjat po aq të forta që ai ka hasur në lidhje me qendrat e të dhënave.
“Kudo që shkoj, njerëzit më pyesin për qendrat e të dhënave”, tha ai. “Prandaj, fakti që këto dy çështje potencialisht lidhen me njëra-tjetrën, mendoj se i zemëron vërtet, vërtet shumë njerëzit.”/Axios
