Nga Tim Kanning, Tokio
Pak kompani po përfitojnë aq shumë nga bumi i inteligjencës artificiale sa TSMC-ja nga Tajvani, prodhuesi më i madh në botë i çipave me kontratë. Megjithatë, në proceset e veta të punës, kompania e përdor këtë teknologji me shumë kujdes.
Në panairet e teknologjisë së lartë në Tajvan, prej disa vitesh inteligjenca artificiale dhe mundësitë që ajo ofron janë kthyer në një nga temat kryesore. Pikërisht për këtë arsye kanë tërhequr vëmendje deklaratat e një prej drejtuesve më të lartë të Taiwan Semiconductor Manufacturing Co., sipas të cilit vetë kompania e përdor këtë teknologji vetëm në mënyrë shumë të kufizuar. TSMC është prodhuesi më i madh në botë me kontratë i çipave të avancuar për qendrat e të dhënave të inteligjencës artificiale të Nvidia-s dhe të shumë kompanive të tjera teknologjike.
Kompania tregohet veçanërisht e kujdesshme në kërkim dhe zhvillim. Sipas Y.J. Mii, përdorimi i papërshtatshëm i inteligjencës artificiale mund të krijojë rreziqe të tilla si rrjedhja e të dhënave dhe korruptimi ose shtrembërimi i tyre. Mii i bëri këto komente gjatë një aktiviteti në Taipei, kryeqytetin e Tajvanit. Ai është Co-Chief Operating Officer i TSMC-së, pra një nga drejtuesit më të lartë përgjegjës për veprimtarinë operative të kompanisë.
“IA-ja nuk e di se çfarë dëmi mund të shkaktojë”
“IA-ja është si një Superman trevjeçar. Mund të jetë jashtëzakonisht e fuqishme, por nuk e di se çfarë dëmi mund të shkaktojë”, tha Mii para studentëve të National Taiwan University, ku edhe ai vetë ka studiuar. “Dhe ajo nuk e di se çfarë është e drejtë dhe çfarë është e gabuar”, shtoi ai, sipas raportimeve të mediave tajvaneze.
Mii iu referua gjithashtu incidenteve të fundit në të cilat modele të OpenAI dhe Anthropic, pa qenë kjo pjesë e sjelljes së synuar, kishin arritur të ndërvepronin me sisteme ose organizata të jashtme.
Drejtuesi i TSMC-së po merrte pjesë në një forum karriere të universitetit, ku studentët e pyetën se si përdoret inteligjenca artificiale në veprimtarinë e kompanisë. Deklaratat e tij vijnë në një kohë kur debati mbi rreziqet e kësaj teknologjie po bëhet gjithnjë e më intensiv.
Disa figura të industrisë kanë paralajmëruar kohët e fundit publikisht se inteligjenca artificiale mund të arrijë një nivel zhvillimi që do të përbënte rrezik ekzistencial për njerëzimin. Dario Amodei, drejtori ekzekutiv i Anthropic PBC, përballë shqetësimeve në rritje për rreziqe serioze, ka bërë thirrje për ngadalësimin e zhvillimit të modeleve më të avancuara të IA-së. Kjo thirrje ka marrë mbështetje edhe nga drejtuesi i OpenAI, Sam Altman, dhe ai i xAI, Elon Musk.
Megjithatë, Mii nuk u përfshi drejtpërdrejt në këtë debat. Skepticizmi i tij lidhej më shumë me kufizimet praktike të inteligjencës artificiale në projektimin e çipave të gjeneratës së fundit. Sipas tij, IA-ja aktualisht nuk është veçanërisht e dobishme për zhvillimin e nyjeve dhe proceseve të ardhshme të prodhimit të gjysmëpërçuesve.
Në të njëjtën kohë, vetë bumi i inteligjencës artificiale po e nxit fuqishëm biznesin e TSMC-së. Meqenëse asnjë kompani tjetër nuk prodhon në të njëjtën shkallë çipa logjikë të avancuar me karakteristika të krahasueshme, kërkesa për kapacitetet prodhuese të kompanisë tajvaneze është rritur ndjeshëm gjatë viteve të fundit.
Vetëm në gusht të këtij viti, të ardhurat e TSMC-së ishin më shumë se 50 për qind më të larta se në të njëjtin muaj të një viti më parë. Që nga fillimi i vitit, kompania ka realizuar tashmë të ardhura prej 3,38 trilionë dollarësh të rinj tajvanezë, ose rreth 92 miliardë euro.
Megjithatë, ritmi shumë i shpejtë i zhvillimit teknologjik sjell edhe rreziqe në proceset e prodhimit. Në një panair të industrisë së gjysmëpërçuesve në Taipei, në fillim të këtij muaji, disa përfaqësues të sektorit paralajmëruan se shpejtësia e madhe e inovacionit mund të çojë në gabime ose defekte gjatë fabrikimit të çipave. Nëse këto defekte shfaqen në çipa të përdorur në sistemet e inteligjencës artificiale, pasojat mund të jenë serioze dhe shumë të kushtueshme.
/F.A.Z.
